Warlene e oa bet krouet ar West Web Festival gant ar West Web Valley, anezhañ ur c’horerez hag ur vuanerez evit an embregerezhioù yaouank eus Brest. Kaset e oa bet en-dro gant Sébastien Le Corfec ha Charles Cabilic eus ar strollad aC3 / Evernet hag ivez gant Ronan Le Moal, pennrener ar C’hef Kengredit Arkéa. Petra eo an abadenn-se ? Evit piv eo ? Petra a zegouezh eno ? Ober a reomp ar poent gant Sébastien Le Corfec.

Ar West Web Festival, ar Web, an aferioù hag ar sonerezh
« E miz Meurzh 2014 hor boa divizet sevel un abadenn evit diskouez e c’hoarvez traoù e Breizh hag evit lakaat pennoù-bras ar web da zont amañ ».
Awenet e oa bet skipailh ar WWV gant an SXSW, ur festival hag a vesk ar sonerezh, ar web hag ar sinema, a vez bep bloaz en Austin (SUA). Aet e oa da-gaout tud an Erer Kozh evit kinnig ar soñjezon dezho. « Fellout a rae dimp krouiñ skol-veur hañv an embregerezhioù yaouank ». Degemeret e oa bet ar soñjezon gant tud an Erer Kozh, ha pevar miz diwezhatoc’h e oa bet abadenn gentañ ar West Web Festival, gant an tem « Web : detox and restart ». Ur programm a-feson a oa bet evit an abadenn gentañ-se gant, e-touez re all, renerien Facebook Frañs, Paypal, Blablacar, My Major Company…
« Gwerzhet hor boa 500 bilhed evit an abadenn gentañ-se, ha sellet e oa bet ouzh livestream ar festival gant 1500 a dud ».

“ En deiz hiziv, ma ne vez ket krouet gwerzh ouzhpennet gant un embregerezh, emañ e riskl da vont da get.”
« Er bloaz-mañ hon eus choazet un tem ledanoc’h hag a zo « No border for digital revolution ». Gant an teknologiezhioù niverel e vo adijinet kement gennad zo, ha ret eo bezañ prest. Gwelet a reer, da skouer, filierenn an taksioù a zo bet gwallgaset penn-da-benn gant Uber, memes tra e gennad al letioù gant Booking pe AirBnB. E-korf un nebeud mizioù pe vloazioù, ez eus filierennoù a-bezh hag a zo steuziet kuit. Ret eo teurel pled ouzh se, ha kompren ervat an dra-mañ : ma ne vez ket krouet gwerzh ouzhpennet gant un embregerezh, emañ e riskl da vont da get.  Eus kement-se e vo anv d’ar 16 ha d’ar 17 a viz Gouere. »

Ur programm evit an holl
Er bloaz-mañ, renerien Venteprivee.com, Deezer, Seloger.com, Leetchi, peotramant rener Uber, disputet-kaer er c’houlz-mañ, a gemero ar gaoz hag a ziskouezo deoc’h penaos e welont ar web hag an aferioù.
Aozet e vo ar festival er memes mod ha warlene, gant kendivizoù eus 9e da 3e, ha sonadegoù an Erer Kozh just war-lerc’h. Graet e vo ivez ur « Startups Battle » all.
Bez’ e vo un nevezenti vihan er fest : ostizien ar web. Ul lec’h ma c’hallo an dud karget eus ar web er strolladoù bras hag en embregerezhioù yaouank, hag ivez tud a-vicher ar web, kejañ an eil re gant ar re all ha kaozeal kenetrezo.

Programm klok : www.west-web-festival.bzh

À propos de Association www.bzh

L'association www.bzh est le registre gestionnaire de l'extension internet .bzh. Par délégation de l'ICANN, organisme régulateur d'Internet au niveau mondial, elle assure la gestion et la promotion de ce territoire numériqué dédié à la Bretagne, sa culture et ses langues.