Bemdez e vevezomp produioù kaset dre ar mor, gant listri-karg bep taol pe dost. Un doare treuzdougen saotrus eo, hag a zo e amzer da zont e dalc’h ar c’hementad tireoul a chom ganimp, pa zigresk hennezh a vloaz da vloaz. Setu m’eo ret klask un doare dougen all. Ar c’hevredad eus Brest TOWT (Transoceanic wind transport) a ginnig unan all diwar-vremañ : ar c’has marc’hadourezh gant bagoù-dre-lien. Pedet oc’h d’ober anaoudegezh gant e obererezh war-eeun e www.transportalavoile.bzh.

Ar c’has marc’hadourezh dre vagoù-dre-lien : gwareziñ an endro, talvoudekaat ar chemet
Teurel a ra ar bagoù 3,5% eus ar CO2 a vez laosket er bed (da lavaret eo tost da 3 gwech ar c’hementad laosket gant Frañs), ha 10% eus an dioskidenn soufr a zo kiriek, e-mesk traoù all, d’ar glaveier trenk. Abalamour d’ar jedadenn-se, ha da zigresk ar c’hementad tireoul a zo da gaout, Diana Mesa ha Guillaume Le Grand, o deus diazezet asambles ar c’hevredad TOWT, a zo en em soñjet war ar ret m’eo gwelet an treuzdougen war vor en un doare all. O soñj ? (Ad)ober gant an treuzgougen dre vagoù-dre-lien. Ouzhpenn bezañ ekologel e c’hall talvoudekaat ur vicher hag a zo a-gozh en istor Breizh : hini ar vartoloded.  

War vor eus Bourdel da Sant-Maloù
TOWT en deus fretaet ur pemzek bag-dre-lien bennak dija evit kas produioù eus ur porzh europat d’unan all. Emañ La Biche, bag-touneta diwezhañ Groe, oc’h ober un ehan e Bourdel goude bezañ karget produioù en Oriant hag en Enez-Euz. Pa vo gwin Boudel en he strad e kemero La Biche penn an hent, ha mont da Naoned, ha goude-se d’an Oriant, Leskonil, Douarnenez, Sant-Maloù, Kameled ha Brest. D’ar 4 a viz Mae e tlefe bezañ distro d’an Oriant, he forzh-stag.

Reiñ talvoudegezh d’ar varc’hadourezh eus ar vro    
Un ugent bennak a broduerien en holl a fizio o froduioù el La Biche hag en he skipailh. Tost da 40 seurt gwin hag ivez boestadoù legumaj pe pesked, bier, gloan pe te, kaset gant bagoù-dre-lien adalek an Azorez, ha chokolad eus ar Republik Dominikan, a vo karget e bourzh ar gouelier bras. Kement-se a ya d’ober un ugent bennak a donennoù marc’hadourezh kaset gant an avel a-hed 1200 milmor pe war-dro.

Gwelet petra eo hol labour   
Paramantiñ ha lestrañ ent niverel    
Kinnig a ra La Biche ur gwir « lestrañ niverel enlinenn ». Evit ar wech kentañ, diwar ar bajenn www.transportalavoile.bzh, e c’hallo pep hini gwelet ar bourzh filmet war-eeun gant ur c’hamera-video stag ouzh ar wern a-dreñv, ha gwelet ar roud GPS, a vo disheñvel hervez ma’z a ar c’heflusker en-dro pe ne ra ket. Ouzhpenn se e vo traoù evel poltredoù ha videoioù, a vo kontet deoc’h pelec’h int bet graet, pe tammoù eus al levr-bourzh.

Ul lec’h a-ratozh war ar c’hae
Klask a ra « Leurenn vreizhat an treuzdougen dre vagoù-dre-lien » lakaat an dud da gompren gwelloc’h peseurt diaesterioù a vo gant an treuzdougen war vor en amzer da zont, ha pegen spletus eo ober gant bagoù-dre-lien. Setu ma vo staliet ur lec’h a-ratozh war ar c’haeoù, d’an dud da c’hallout « lestrañ » er soñjezon-se, e Bourdel, e Naoned, en Oriant, er Gerveur, e Sant-Maloù pe e Brest. Eno e vo staliet an diskouezadeg “Des voiles à la charge”. Savet eo bet « Pabell vras » ar glad, e koad hag e lien, gras da chemet Porzh-mirdi Douarnenez. Ijinet e oa bet gant studierien SEUAB e Brest. Reiñ a ray bod d’ul lec’h da ziskouez traoù ha d’an dud da gejañ an eil re gant ar re all, ma vo gallet kaozeal gwelloc’h, e-kreiz porzhioù bras ar meurvor Atlantel e Frañs.
Kavit an holl ditouroù all diwar-benn an dra-se el lec’hienn www.transportalavoile.bzh

À propos de Association www.bzh

L'association www.bzh est le registre gestionnaire de l'extension internet .bzh. Par délégation de l'ICANN, organisme régulateur d'Internet au niveau mondial, elle assure la gestion et la promotion de ce territoire numériqué dédié à la Bretagne, sa culture et ses langues.