Adkavout un dibab eus blazioù Breizh, bep miz, e-barzh ur voest, forzh pelec’h er bed, sed aze ar pezh a fell da Loïz Fily ha Julien Kersalé kinnig gant Penn ar Box, ar raktres o deus lañset. Daou baotr eus Penn-ar-Bed eo ar re-se, nevez-diplomet gant Brest Business School.
Kejet hon eus gant an daou embreger yaouank en o burev, er c’horerez Produet e Breizh, e Brest.

Julien Kersalé a zispleg dimp penaos e oa kroget ar raktres-se : « da-geñver hor studioù e oamp aet d’an estrenvro, Loïz da Gaerdydd, e Kembre, ha me da Viami. Evit stourm ouzh kleñved ar gêr e farden ma c’hrampouezh din-me, ma c’haramel ha ma gwastelloù mod Breizh, hag e lakaen ma mignoned da dañva anezho. Evit Loïz, resev a rae ingal pakadoù boued hag a veze kaset dezhañ gant e familh. Ar mank-se, hag ar c’hoant da gavout ar produioù breizhek a garomp, pell diouzh ar gêr, o deus roet ar soñj-se dimp. »
Plij ha Buhez, div voest, daou veizad
Daou seurt boest a vez kinniget. An hini gentañ eo ar « Buhez box » (boest ar vuhez), a zo kontet da vezañ « ar rikoù evit chom bev, na c’hallfe ket ur gwir Vreton ober hepto ». Enni e vo, bep miz, dek produ brudet eus Breizh, « produioù hag a zo anavezet gant an holl Vretoned, evel ar pastez Hénaff pe ar c’haramel gant amann sall eus ti Brieuc, an holl anezho gant an dikedenn ‘Produet e Breizh’ ».
An eil boest eo ar « Plij box » (boest ar blijadur). Ganti e vo kinniget bep miz un dibab eus pemp pe c’hwec’h produ eus Breizh. Dibar e vo ar voest-se rak enni ne vo nemet produioù ha ne vezont ket gwerzhet er stalioù bras. « Soñjet hon eus e vefe mat brudañ produioù nevez, produerien nevez », a zispleg Loïz Fily. Bep miz e vo kinniget un dibab nevez. Setu ez eo graet ar voest-se ken evit an dud divroet, ken evit ar Vretoned a zo o chom e Breizh hag o deus c’hoant da dañva blazioù nevez.
Boestoù kentañ kaset d’ar 15 a viz Du
A-benn bremañ e c’haller dija urzhiañ ur voest pe meur a hini el lec’hienn www.pennarbox.bzh. Meur a seurt koumanantoù a ginniger, eus ur miz da zaouzek miz. 27,90 € ar miz evit ar « Plij box » ha 42 € ar miz evit ar « Buhez box » eo ar prizioù izelañ. Kaset e vo ar boestoù kentañ d’ar 15 a viz Du.
Asambles gant pep boest e vo kaset ur gelaouenn ugent pajenn diwar-benn ar produioù a vo enni hag ar broduerien anezho, ha kinniget e vo ivez ur rekipe fardet gant « Penn ar chef », Nathalie Beauvais, mestrez-keginerez ar preti “Al liorzh lipous” en Oriant. Evit ar blijadur (hag evit mad ar blanedenn), ne vo ket lakaet ar boestoù er pod-lastez, met talvezout a raimp da amplaer evit ar poellgomzerioù. Neuze, bec’h d’ho logodennoù (hag a-benn nebeut, kit da welet e-barzh ho poestoù-lizheroù) !
Gouzout hiroc’h : www.pennarbox.bzh

À propos de Association www.bzh

L'association www.bzh est le registre gestionnaire de l'extension internet .bzh. Par délégation de l'ICANN, organisme régulateur d'Internet au niveau mondial, elle assure la gestion et la promotion de ce territoire numériqué dédié à la Bretagne, sa culture et ses langues.