Penaos gwellaat degemer ha surentez ho posteloù ?

📧🔒 Evit gwareziñ ar postelerezhioù diouzh an treuzpiaouañ identelezh hag ar floderezh e vez astennet reoladoù dilesa ar posteloù gant ar bourvezerien boestoù-posteloù. Ar servijoù postelerezh (Gmail, Yahoo, Hotmail,…) o deus kreñvaet nevez zo o rediennoù er c’heñver-se neuze. Padal, ar rediennoù surentez-se, mat d’an ekoreizhad niverel, a c’hell lakaat en arvar degemer ar posteloù a gasit.

Evit gwir e ranker, evit kas posteloù da voestoù evel Gmail pe Hotmail, doujañ d’ar reoladoù SPF, DKIM ha DMARC. Mirout a ra an teir hentenn-se ouzh ar stroberien hag ar besketaerien a gas posteloù e anv un domani n’int ket perc’henn warnañ. E talvoud emañ ar reolennoù-se evit an holl anvioù domani ha pa vefent e .com, .fr pe e .bzh.

🔎 Ar reoladoù SPF, DKIM ha DMARC

Perc’henned pe implijerien anvioù domani ha n’o deus ket kefluniet mat SPF, DKIM ha DMARC a c’hell stadañ e vez lakaet en dispell evel stroboù o fosteloù kaset, pe ne vezont ket deroet d’o reseverien. E taras e vezont ivez e vefe treuzpiaouet o identelezh gant stroberien.

Penaos e ya en-dro an hentennoù dilesa-se ?

• SPF (Sender Policy Framework) : SPF zo ur gwikefre dilesa a c’heller gantañ gwiriañ hag aotreet eo ur servijer postelerezh da gas posteloù e anv un domani dibar. Gellout a rit lakaat war-sav ur politikerezh SPF o kefluniañ war-eeun ho takad DNS pe o weredekaat an arc’hweladurioù kinniget gant ho pourvezer anv domani (sellet ouzh ar roll amañ dindan).
• DKIM (DomainKeys Identified Mail) : DKIM zo ur gwikefre dilesa all a c’heller gantañ sinañ ent-niverel ar posteloù kas. Gellout a ra ar resever gwiriañ ar sinadur-se evit bezañ sur e teu da vat ar postel eus an domani merket.
• DMARC (Domain-based Message Authentication, Reporting, and Conformance) : DMARC zo ur politikerezh surentez hag a genstroll SPF ha DKIM. Gantañ e c’heller spisaat an doare ma tleer tretiñ ar posteloù n’int ket diouzh ar reoladoù (distaolet, lakaet en dispell pe degemeret).

Ha doujañ a ra ho tomani d’ar reoladoù SPF, DKIM ha DMARC ?

Evit gouzout ha kefluniet mat eo hoc’h anv domani e c’hellit implijout binvioù enlinenn evel Mail-Tester pe ar porched Internet.nl.

Hervez ar studiadennoù kaset gant an Afnic ha gant hor c’hevredigezh e vez doujet d’ar reolad SPF gant 58 % eus an anvioù domani e .fr ha 70 % eus an anvioù e .bzh o deus gweredekaet boestoù-posteloù. Chom a ra un tamm hent d’ober met an dalc’hoù a dalvez ar boan : boazietoc’h-boazietañ eo an treuzpiaouañ identelezh, ar pesketa pe c’hoazh ar rañsonañ. Unan eus ar skoroù implijetañ evit an doare siberargad-se eo ar postel. Rankout a raio ho framm talañ ouzh seurt tagadenn abred pe diwezhat. Ret eo deoc’h plediñ gant lakaat war-sav ar reoladoù SPF, DKIM ha DMARC neuze, evit gwellaat ho surentez ha degemer ho kemennadoù.

🔒 Gwellaet e vez degemer ha surentez ho posteloù

Dre zoujañ d’ar reoladoù SPF, DKIM ha DMARC e wellait degemer ha surentez ar posteloù en doare-mañ neuze :

• Dizarbenn ouzh an treuzpiaouañ identelezh : Mirout a ra SPF, DKIM ha DMARC ouzh an argaderien a gas posteloù flodus o tremen anezho deoc’h.
• Gwareziñ diouzh dasparzh an drougiantoù : ar posteloù dilesaet ne c’hellfe ket bezañ meziantoù drouk enno.
• Gwellaat an dereiñ posteloù : muioc’h a fiziañs o dez ar siloù enepstrob er posteloù diouzh ar reoladoù SPF, DKIM ha DMARC ha gwarantiñ a reont e vo degemeret mat ho kemennadoù gant o reseverien.
• Gwareziñ diouzh an dasparzh stroboù : gellout a ra ar posteloù n’int ket diouzh ar reoladoù bezañ distaolet pe lakaet en dispell.
• Derc’hel da vrud hoc’h aozadur hag ho tomani : gant ur c’hefluniadur a-zoare e vez kreñvaet fiziañs ar bourvezerien bostelerezh en ho tomani.

💡 Penaos lakaat war-sav dilesadur ho posteloù ?

Ar burevioù marilhañ ho peus marilhet hoc’h anvioù domani diganto a ginnig tutorialoù evit kefluniañ gant an dorn DNS ho tomani pe dre o etrefas. Gant un toullad mat anezho e vo gweredekaet emgefreek ar reoladoù-se ma rit gant o servijoù postelerezh.

Kavout a reoc’h amañ dindan al liamm war-du tutorialoù hor pennañ burevioù marilhañ keveler.

Gellout a rit ivez mont da gaout hon ajañsoù web keveler evit bezañ ambrouget en difrae-se.