Ober a ra ar burevioù marilhañ war-dro gwerzhañ marilhadurioù anvioù domani. Int a zo aozadurioù eilgwerzhañ enkredekaet gant an ICANN ha gant hor c’hevredigezh. Endalc’het int da blegañ da ziferadurioù ar gevrat enkredekaat skoulmet gant an ICANN ha d’an emglevioù kevraouet gant hor c’hevredigezh. Mont a ra o servijoù eus gwerzhañ anvioù domani, betek krouiñ lec’hiennoù internet pe herberc’hiañ roadennoù, koulz ha gwareziñ merkoù war internet.
Hiziv an deiz ez eus ouzhpenn 30 burev marilhañ eilgwerzher o labourat gant ar gevredigezh www.bzh, hag int strewet er bed a-bezh. Ouzhpenn un drederenn anezho a zo staliet e Frañs.
Evit prenañ hoc’h anv e .bzh eo ret deoc’h mont davet un eilgwerzher, burev marilhañ enkredekaet gant an ICANN ha gant ar gevredigezh www.bzh, pe un ajañs kehentiñ hag a labour gant unan anezho. Kavout a reoc’h amañ dindan roll an eilgwerzherien enkredekaet
Kemmañ a ra priz ar .bzh diouzh ar servijoù kinniget gant an eilgwerzherien
Gwerzhañ a ra ar gevredigezh pep anv domani d’ar burevioù marilhañ d’ar priz diazez 35 € PTM (e-maez priz dibar) e-pad bloaz. Heñvel eo ar priz 35 € PTM evit krouiñ pe kenderc’hel un anv domani. Lakaat a ra ar burevioù marilhañ o priz gwerzhañ dezho o-unan diouzh o c’hoant. Gellout a ra ar priz gwerzhañ kemmañ diouzh ar servijoù a ginnigont ouzhpenn (herberc’hiañ, merañ chomlec’hioù postel, krouiñ lec’hiennoù web,…).